Gwaith wedi dechrau ar safle datblygiad tai newydd ar Ynys Môn
Mae cynllun datblygu tai newydd ar Ynys Môn wedi dechrau’n ddiweddar yn agos at gampws Pencraig Coleg Menai yn Llangefni.
Bydd y prosiect £9.6miliwn, sy’n cael ei arwain gan ClwydAlyn mewn partneriaeth â Chyngor Sir Ynys Môn a Llywodraeth Cymru, yn creu 60 o gartrefi fforddiadwy newydd a fydd ar gael i’w prynu neu eu rhentu erbyn Mai 2023.
Bydd y datblygiad yn cynnig cartrefi effeithlon o ran ynni gyda chyfradd A EPC a byddant yn cynnwys amrywiaeth o dechnolegau cynaliadwy, gan gynnwys pympiau gwres ffynhonnell aer a fydd yn lleihau’r costau gwresogi ac yn lleihau’r allyriadau carbon.
Dywedodd Craig Sparrow, Cyfarwyddwr Gweithredol Datblygu ClwydAlyn:
“Mae hwn yn gynllun newydd cyffrous ar Ynys Môn a fydd yn cynnig cartrefi fforddiadwy o safon uchel a bydd yn ymdrin â’r angen am dai yn yr ardal leol yn ogystal â chynnig cyfle gwych i fyfyrwyr o’r coleg ddysgu.”
“Ein cenhadaeth yw trechu tlodi ac ymdrechu a sicrhau bod gan bawb yng Ngogledd Cymru fynediad at dai o safon ragorol.
“Rydym yn falch iawn o gael gweithio mewn partneriaeth ag Anwyl Partnerships a Chyngor Sir Ynys Môn i’r cynllun ddwyn ffrwyth a diwallu anghenion lleol, yn ogystal â rhoi hwb i gyflogaeth yn lleol.”
Bydd Anwyl Partnerships yn gwneud y gwaith adeiladu ar y safle, gan ddefnyddio eu tîm prosiect mewnol profiadol gyda chefnogaeth cadwyn gyflenwi leol, yn cynnwys contractwyr a chyflenwyr.
Bydd y safle 4.2 erw, a oedd yn rhan o gampws y coleg yn y gorffennol, yn ddatblygiad newydd fydd yn cynnwys 44 o dai dwy a thair ystafell wely ac 16 o fflatiau dwy ystafell wely.
Dywedodd Mike Nevitt, Rheolwr Gyfarwyddwr Anwyl Partnerships:
“Mae hwn yn brosiect sy’n ei hanfod yn cynnwys adeiladu cymuned newydd sbon yn Llangefni, gan greu 60 o dai fforddiadwy y mae angen mawr amdanynt ar rent/i’w gwerthu.
“Mae cymuned o bwys gwirioneddol gyda’r prosiect hwn ac mae’r safle wedi ei ddylunio i helpu i feithrin yr ethos hwn. Bydd ein dull yn cyd‐fynd â gweledigaeth dymor hir ein cleientiaid a bydd yn cael ei harwain gan y gymuned bob cam o’r ffordd.”
“Mae gan Wasanaeth Tai’r Cyngor gyfrifoldeb statudol i asesu anghenion tai ac arwain ar weithio mewn partneriaeth i ddarparu tai o safon uchel yn lleol. Bydd ein Strategaeth Dai 2022 ‐ 2027 yn ganolog wrth i ni weithio’n annibynnol, a gyda phartneriaid allweddol, i barhau i fodloni anghenion ein preswylwyr yn awr ac yn y dyfodol.”
Ychwanegodd y Cynghorydd Mummery:
“Rwy’n falch o weld bod y gwaith wedi dechrau yn Llangefni. Rydym wedi gweld cynnydd sylweddol ym mhrisiau tai Ynys Môn ac mae mwy fyth o angen i gefnogi teuluoedd lleol i mewn i’r farchnad dai. Bydd y datblygiad hwn yn ein helpu i wneud hyn; a bydd o fudd i gwmnïau lleol a’r economi.”
Mae’r cynllun yn rhan o raglen ddatblygu ClwydAlyn i ddarparu 1500 o gartrefi newydd yng Ngogledd Cymru erbyn 2025 am fuddsoddiad o £250m gan ddod â chyfanswm y tai y maent yn eu rheoli i dros 7,500