Partneriaeth ClwydAlyn a Cymru Gynnes yn ail mewn gwobrau cenedlaethol

Mae ClwydAlyn mewn partneriaeth â Cymru Gynnes wedi cael eu cydnabod yng Ngwobrau Ymarfer Da TPAS Cymru 2023 fel yr ail yn y categori ‘Rhaglen Gefnogi/Cynghori Preswylwyr’.

Nod y prosiect Cartrefi, Pobl, Bywydau a Chymunedau Iach yw cefnogi defnyddwyr ynni ar draws Gogledd Cymru, a hyd yn hyn mae bron i 3,000 o ymyraethau wedi digwydd i helpu preswylwyr gyda gwres fforddiadwy a 2,500 arall o aelwydydd yn cael awgrymiadau a chyngor ar arbed ynni.

Mae Gwobrau Ymarfer Da Cenedlaethol TPAS Cymru yn cydnabod a dathlu’r gwaith gwych y mae cymdeithasau tai a thenantiaid yn ei wneud yn eu sefydliadau a’u cymunedau, gan dynnu sylw at y ffordd y mae landlordiaid cymdeithasol wedi bod yn buddsoddi yn eu tenantiaid a’u cymunedau a’u cefnogi a helpu preswylwyr i oresgyn heriau a gwella eu bywydau.

“Rydym yn falch iawn o fod wedi cael ein cydnabod a’n rhoi ar y rhestr fer ar gyfer gwobr mor bwysig, a oedd yn bosibl oherwydd gwaith eithriadol ein tîm ymroddedig. Hoffwn hefyd longyfarch enillydd y categori hwn, Adra (Tai) a wnaeth ein curo."

“Rydym ar ymgyrch i drechu problemau dyrys fel yr argyfwng ynni, ac rydym am arwain y sector pan ddaw yn fater o ddynodi ac ymdrin â’r achosion sylfaenol rhwng tlodi tanwydd, anghyfartaledd iechyd y gellir ei osgoi a llesiant."

“Yr argyfwng costau byw presennol yw’r eiliad ddiffiniol yn ein cyfnod ac mae ClwydAlyn yn ymroddedig i chwarae ein rhan wrth ymdrin â’r mater. Fel rhan o’n hymrwymiad, rydym wedi bod yn gweithio’n glos gyda Cymru Gynnes i sefydlu prosiect Cartrefi, Pobl, Bywydau a Chymuned Iach, sy’n dynodi aelwydydd bregus ac yn cynnig dull holistaidd sy’n rhoi’r pwyslais ar y person, gan gynnig help, cyngor a chymorth arbenigol."

“Er mwyn cyflawni hyn mae dros 500 o weithwyr rheng flaen wedi cael eu hyfforddi gan ddarparu cymorth mewn dwy haen, dull ysgafn a thrylwyr, o bwyslais ar gyfeirio a chodi ymwybyddiaeth i ymyraethau wedi eu teilwrio ar gyngor ynni, arian a llesiant.“

Dywedodd Gareth Gathern

Pennaeth Rheoli Asedau yn ClwydAlyn

“Mae dod yn ail am y wobr hon yn wych. Ein nod yn Cymru Gynnes yw creu gwres fforddiadwy a lliniaru tlodi tanwydd, ac mae’r cyfle i ffurfio partneriaeth â ClwydAlyn i gyflawni cyngor ynni a chymorth i gymaint o breswylwyr ar draws Gogledd Cymru trwy’r cynllun wedi dod ar yr amser iawn, lle mae pobl yn cael trafferth gyda’r argyfwng costau byw. Mae dod yn ail am y wobr cyngor a chymorth yn dangos bod yr hyn yr ydym yn ei wneud o bwys ac yn gwneud gwahaniaeth gwirioneddol i’r rhai yr ydym yn eu cefnogi.”

Dywedodd Joanna Seymour

Pennaeth Partneriaeth a Datblygu yn Cymru Gynnes

Hyd yn hyn mae’r prosiect wedi helpu pobl gyda:

Arian banc tanwydd (Nwy a thrydan argyfwng i’r rhai sy’n talu ymlaen llaw)
Cyngor ar Ynni, chefnogaeth, deall biliau ynni, cyngor ar dariff
Galwadau tair ffordd gyda darparwyr ynni, cynlluniau talu
Cymorth bwyd
Camau effeithlonrwydd ynni eraill gan gynnwys systemau gwresogi
Cyngor ar ddyledion
Tariff dŵr cymdeithasol (Help U, Water Sure)
Cronfa Gymorth trwy Ddisgresiwn (gan ddarparu nwyddau gwyn, dodrefn, tanwydd)
Cronfa wres (Olew, LPG, Tanwydd Solid)
Cefnogaeth gyda dyledion ariannol
Cymorth/cyngor budd-daliadau
Asesiadau llesiant

Ychwanegodd Gareth:

“Rydym wedi ymrwymo i drechu tlodi a helpu cymaint o bobl â phosibl i fyw’n dda yn eu cartrefi gan hefyd ymdrin â’r brys o ran yr argyfwng hinsawdd. Mae’r prosiect hwn wedi bod yn wasanaeth hanfodol i gymaint o bobl mewn argyfwng ac i helpu i leihau tlodi tanwydd.

Ein nod yn awr yw parhau i weithio gyda’n partneriaid a rhannu arfer da wrth i ni barhau ar ein taith i daclo tlodi yma yng Nghymru ac mae derbyn y wobr hon yn golygu llawer i ni.”